“MILLION”chilarning qaltis hazillari
Jamoaning litsenziyadan mahrum qilinishi sabablari oydinlashdi
Keyingi yillarda o’zbek qiziqchilik san’atida bir necha yangi qiyofalar kashf etildi. Xususan, "Komedi.uz”, "Dizayn”, "Million” jamoalarini bunga misol qilib keltirishimiz mumkin. Ayniqsa, "Million” jamoasining chiqishlari ko’pchilikni e’tiborini tortdi. Munosabat ham shunga yarasha: kimdir jamoani maqtasa, yana kimdir umuman hazm qila olmadi. yaqinda ommaviy axborot vositalari va ijtimoiy tarmoqlarda tarqalgan "Million” litsenziyadan mahrum etilganligi to’g’risidagi xabar ko’pchilikni befarq qoldirmagani aniq. Bu boradagi taxmin va ovozalarga aniqlik kiritish maqsadida "Million” jamoasi a’zolari Behzod Komiljonov, Davron Kabulov hamda "O’zbeknavo” estrada birlashmasi bo’lim boshlig’i Odiljon Abduqahhorovlarni suhbatga chorladik.
— Oldin bir narsaga aniqlik kiritib olsak: "Million” avval ham bir necha bor ogohlantirilganmi?
Davron Kabulov: — "Bir necha marta” deyilishi noto’g’ri. O’tgan yili kontsert qo’yayotganimizda "O’zbeknavo”dan ogohlantirish olganmiz va ularning tavsiyalari bo’yicha dasturga o’zgartirishlar kiritilgan.
— Ilk kontsert dasturlaringizdagi Mirjalol Qosimov bilan bog’liq ko’rinish hali ham ko’pchilikning yodida. Terma jamoamiz bosh murabbiyidan kechirim so’raganlaring rostmi?
Davron Kabulov: — Mirjalol Qosimovdan jamoamizning hech bir a’zosi kechirim so’ramagan, chunki kechirim so’raydigan narsaning o’zi yo’q. Hazillar terma jamoani jahon chempionatiga chiqa olmagani bilan bog’liq, shaxsiyatga tegadigan emas. Tadbirlardan birida Mirjalol akani uchratib qoldik, o’xshatish qilgan yigitimiz — Otabek Mirjalol akani oldiga borib, o’zini tanishtirgan, u kishi "E, o’sha bola senmiding, rosa boplapsan-ku? O’zim ko’rmadim, lekin ko’pchilik aytdi” degan. Bor gap shu.
— "Million” ko’pchilikning nonini yarimta qilib yurgani uchun shu ahvolga tushdi, degan da’volarga nima deysiz?
Behzod Komiljonov: —Jamoamizda faqat Davron professional tarzda shou-biznes bilan shug’ullanadi, qolgan yigitlar uchun bu o’ziga xos xobbi. Xabaringiz bor, 4 kun davomida "Istiqlol” san’at saroyida kontsert berdik. Eng past – 10 mingdan 50 ming so’mgacha bo’lgan narxlarni belgiladik. Hamma yoqqa tarqalib, qo’lma-qo’l bo’lib ketgan disklardan ham bizga hech qanday moliyaviy foyda yo’q. Qolaversa, "Million” jamoasida o’rnatilgan temir qoida bor — jamoa to’y xizmatlariga bormaydi.
— "Do’st kim, dushman kim, bilinib qoldi”, debsizlar. Buni qanday tushunish mumkin?
Behzod Komiljonov: — Kontsertlarimiz, disklarimizni ko’rib, maqtab yurganlar gazetalar, saytlarda maqolalar chiqib, litsenziyamiz olingandan so’ng orqavarotdan "to’g’ri bo’pti, allaqachon shunday qilishlari kerak edi”, deyishibdi...
— Bu muammolarga duch kelmaslik uchun kontsert dasturi stsenariysini "O’zbeknavo” mutasaddilariga ko’rsatib olsalaringiz bo’lmasmidi?
Davron Kabulov: — Stsenariyning xomaki nusxasi ham, sahnada ketadigan yakuniy ko’rinishi ham "O’zbeknavo”dan o’tkazilgan. Busiz iloji yo’q. Faqat bir narsani tushunmayapmiz: kontsert 5 oy avval bo’lib o’tdi, disklar chiqqaniga ham bir-ikki oy bo’ldi. Birdaniga gazetalar, saytlarda tanqidiy maqolalar, shov-shuv...
— Yigitlar, oxirgi dasturda qaltis, qo’pol hazillar ham ketganligini nega tan olmaysizlar? Sanab berishim mumkin.
Behzod Komiljonov: — «Kamchiligimiz yo’q, litsenziyadan bekor mahrum qilishdi», degan fikrdan umuman yiroqmiz. Bizni to’g’ri tushunishlarini istardik: "Million” yigitlari 6-7 yildan beri san’atda o’zini sinab yurgan bo’lsa-da, jamoa sifatida shakllanganimizga endi bir yildan oshdi. Bor-yo’g’i 2 ta kontsert qo’ydik. Qisqasi, endi yo’limizni topyapmiz.
Davron Kabulov: — Har qanday tanqidni qabul qilishga tayyormiz. Chunki hali bir narsani qoyillatib qo’yganimiz yo’q. Faqat kelib, biz bilan tanishib, "Qani, senlar nima qilyapsan o’zi? Mana bu sahna ko’rinishi orqali nima demoqchisan” deb bir og’iz fikr so’ramasliklari alam qiladi. "Yoshlar tarbiyasiga salbiy ta’sir o’tkazadi”, deyishibdi. Yillar mobaynida shakllanadigan tarbiya qanday qilib uch soatlik dastur davomida buzilishi mumkin?
— Ijtimoiy yuki bor ko’rinishlarga ko’proq urg’u berilsa yaxshi emasmidi?
Davron Kabulov: — Kundalik hayotdagi muammolarni sahnaga olib chiqishga harakat qilyapmiz. Bir narsani to’g’ri tushunaylik: kulgu dasturlari boshdan-oyoq jiddiy mavzular atrofida o’ralashaversa, tomoshabin uchun qizig’i qolmaydi. "Million” sahnaga majlis o’tkazishga emas, kontsert berish uchun chiqadi.
"O’zbeknavo” estrada birlashmasi bo’lim boshlig’i Odiljon Abduqahhorov:
— "Million” jamoasining litsenziyasi haqiqatan ham tugatilgan. Jamoa a’zolariga buning sabablari tushuntirildi. Bu chora jamoa yo’l qo’ygan xato va kamchiliklarni bartaraf etishlari uchun qo’llanildi. Kontsert dasturi davomida stsenariydan chetga chiqish holatlari bo’lgan, qolaversa, litsenziya aynan mana shu kamchilik uchungina tugatilgani yo’q. Boshqa san’at turlari kabi qiziqchilikning ham o’ziga yarasha talablari bor va istaysizmi-yo’qmi, ularga amal qilish kerak. O’ylaymanki, jamoa bundan to’g’ri xulosa chiqaradi. Keyinchalik ijobiy o’zgarishlar ro’y bersa, litsenziya olib, yana faoliyatlarini davom ettirishlari mumkin.
"Million” jamoasi a’zolari, "O’zbeknavo” mutasaddisi va jurnalist fikrlari bilan tanishdingiz. Bu vaziyatda yana bir tomon — muxlislar ham borligini unutmasligimiz kerak. Kulgu san’ati vakillari (bu gap "Million” jamoasiga ham tegishli) ba’zan tor davralar, gap-gashtaklarda aytishga loyiq latifalar, ko’rinishlarni sahnaga ko’tarib chiqishdan tap tortishmayapti. Me’yor, did emas, "tomoshabin shuni xohlayapti”, degan bahona ko’pincha tosh bosib ketayotganini inkor etolmaymiz.
Azizbek ABDUVALIEV.
"Darakchi"dan olindi